MANDARINAS, POMELOS, LIMONES Y NARANJAS
En Estremaúra, assina como en Sentiris Estremeñus, assín en toa España, ai mucha genti salá, mu salá…, genti dulci, mu dulci, incluso pa algunus, demasiao edulcorá…, genti con mucho saleru, con mucha salsa, genti sabrosa, genti que sabe bien, i sienta bien al paladar, genti jugosa, estupenda, maravillosa, pero lo mesmo aila genti ácida, mu ácida…, i genti picante, que pica, picajosa, i genti amargá, i que solo amargan.
Pa to los gustos ailos i pa toas las salsas. Ca uno consume lo que le gusta, i lo que no, lo rechaza; no tenemus porqué aguantá a toa la genti i menus a esa genti que está pasá, esa genti pocha, esa genti aguá, esa genti avinagrá.
Personalmente, me gusta la genti templá, ni demasiao calienti ni demasiao fría, tampoco helá, me gusta la genti fresca, pero no demasiao fresca… I lo que no soporto es la genti que hueli i sabe mal, que sienta mal a la vista i al paladar: la genti agria, la genti indigesta, la genti rancia…
En esti grupo, assina como en otrus estremeñus y assín en toa España, mucha genti colabora en poné la mesa, en cociná las viandas, en adorná la estancia, en servil al comensal, en intentá agradá a la mayoría regalandu su tiempo, sus horas, sus días…, sin pedil na, solo respetu.
Vamus a intentá agradecer-selu i, en to casu, a no amargalas.
Agradecíu, buena digestión a tos i toas.
28/04/2024
Pedro Parrina
